الفضائح وانتشرت، وكل شيئ انكشف
في المجلس
على المدونات
شكرا للمدونات الشجاعة: ساحة الصفاة، أم صدة، موقع الأمة
وحتى في الجرائد
وبعدين؟ أعيد سؤال النائب محمد الصقر، شنو هالقوة الي عنده؟
ليش محد قادر عليه؟
بوق موثق واستخفاف بالعالم ووجه نشف فيه ماء الحياء
يحضر المناسبات والافتتاحات ولا كأنه متهم بأخطر سرقات المال العام في تاريخ البلد
الى متى علي الخليفة؟ منو يقدر عليه؟
اللهم سلط عليه سوبرمان أو رامبو يخلصنا منه بما أن محد فينا قادر عليه
------------------------------------------------------
المحزن في الموضوع، أن على خلفية التساهل مع أكبر حرامية البلد الكثير ممن كان لهم موقف مناهض لإسقاط القروض غيروا رأيهم وأصبحوا يؤيدون، يقولون الفلوس رايحة في بطون الحرامية، مو أحسن نستفيد منها احنا
كيف نرد على هذا المنطق؟
---------------------------------------------------------
حالة احباط أوقفتني عن كل النشاطات، يا ترى الجو المغبر أم البوق المسكر؟
لكن لابد من المشاركة
لاتنسون غدا ندوة التحالف الساعة 8 مساءاً
عن البوق
:)
26 comments:
انشالله باجر بحضر ولو اني متحفظ على المكان وضيج المساحة فيه .
سالفة علي الخليفة ودعواه اللي رفعها تذكرني بالمثل اللي يقول النملة لي ريشت دنا زوالها .
اصبح الامر بالنسبة لي واضح
علي الخليفة لم يكن وحيدا في هذه المسألة منذ البدايه
من ساندوه في السابق ولا زالوا يساندونه هم مربط الفرس
عزيزتي
هل تعلمين لماذا لا أحد يستطيع أن يدين الحرامي علي بابا؟
ليس بسبب النفوذ الذي لديهأو من يقف خلفه, أو جريدته العفنة, أو الطبالين من المحررين والمحاميين
السبب هو عدم وجود أحد نظيف لم يتدنس هو الأخر بالمال الحرام
هل سمعت يوما بلص إستطاع أن يحاسب لصا أخر؟
تحياتي
صباحك خير و انشالله تروح حالة الاحباط هذي
و تتبخر مع حر الصيف
:)
الصراحة كنت مار أسلم
لكن الأخت لمياء استفزتني بتعليقها
رغم ما في الكلام من احباط إلا انه مقنع
و واقعي للي قاعد يصير
الله المستعان
حمد
المكان معاك حق، بس كله يهون لعيون الكويت
:)
والنملة مريشة حدها، متى الزوال بس؟
moodless
صحيح الكلام، مثل ما فضحناه، نفضح ربعه
يلا، منو ربعه؟
:)
لمياء
مو المال السايب يعلم السرقة، خلو حتى النظيف ايده تحكه
بس لو خليت خربت، المخلصين مازالوا موجودين
خليك أكثر تفاؤلاً يا حالمة
مع اني هالأيام أبيلي أحد يشجعني على التفاؤل
:)
هلا طائر
الظاهر كنت أكتب تعليقي نفس الوقت معاك
:)
سلامك واصل والإحباط أصبح حالة كويتية مزمنة
بس نطلع منها قريباً ان شاء الله
الى الآن تطير بلا وطن؟؟
:)
ينحان بيضا
شفت الإحباط يدني منك فقررت احضر بسحري و اكشه
الشعب الكويتي الأصيل ما نخ حق الغازي فلا تعتقدين انه راح ينخ حق حرامي ما يسوى بيزة
وبعدين لا عنده قوة ولا شيء فهو في النهاية عبد مثلنا الله فوقه و قبره تحته
Anyways, how are you :)
كلمة معجزه شويه فيه ...
هو يتبع حذافير الاغنية الشهيرة : بوق على مهملك بوووووق بكرة الدنيا تروووق :)
مساؤك فل
الرد المنطقي ان ماكو منطق معاهم هم ماشين على مبدأ من لديه فليحتال فحيلتهم أو منطقهم ليش هم تروح ببطونهم احنا بعد خل نستفيد يعني ببوقون بس ما يبون أحد يقول عنهم حرامية
مثل واحد قالولا شتسوي لو أحد يبي يعتدي على إختك قال أذبحه لأن آنا أولا فيها هي دمي ولحمي
يعني بيمنع الجريمة بجريمة أقبح منها والربع نفس الشي او نفس المنطق
فالله يساعد البلد والفقير
انا مع لمياء
الموضوع ينحصر في تطبيق القانون , القانون لا زم يتطبق على الكل وبهالحاله الناس تصير تحترم القانون وتحترم السلطة , حاله الاستهتار وكسر القوانين الموجودة في المجتمع هي بسبب عدم تطبيق القوانين وعلى الكل
يقال وبينى وبينج لا تقولين لأحد :) ان على الخليفه صح ان حرامى وباق لكن اهوا مو الراس الكبيرة , الراس الكبيرة اهوا .... والله يستر منكم يا النساء , يقولون تنشرون الأخبار بسرعه صج ؟ :P
غريبة ؟؟
ليبرالية الهوي وتقف ضد محمد الصقر اللى فجأة تنازل من برجه العاجى وفكر الدماء الزرقاء ليقود حملة ضد سراق المال العام :)
سبحانك ربى
لمياء
هناك اشخاص عدة لم تدنس ايديهم بسرقة المال العام
ولكنهم لم ينتهجوا نهج نعيمة شخلع
هللوو :) من زمان! انشالله بخير
مقدور عليه انشالله، من غير لا سوبرمان ولا رامبو.الحقيقة واضحة، وخنشوف اذا التستر ينفع. ومثل ما قال سعود، فهي مسألة تطبيق القانون. بس صار لنا سنين بظلام الفساد، وصار تعود على استغلال المنصب من غير حساب
It seems in Kuwait: The larger they are, the slower they fall…Now, let's see how hard ..and how many fall!
الله يستر
شلون الندوة
shosho
أنا زينة، وأنت يا حلوتي، كيف حالك؟
أنا من سمعت اسمي منك "ينحان بيضا" راح كل الإحباط
طالعة منك زي العسل
:)
أبو اسحق
طيب وبعدين يابو اسحق؟ سحر والا رقية والا عمل يخلصنا منه؟؟
:)
authoress
مساؤك ورد وياسمين
متى الدنيا تروق؟
:)
كادي
البعض بدأ يفكر بهذا الإسلوب من يأسه، وضع محزن فعلاً
متى بنشرب قهوة؟
:)
مطقوق
وأنا وياكم
:)
سعود
أفا والله، وأنا أقول انكم نصير النساء
يعني أنا أدري من زمان انك خاطب نانسي عجرم، سمعتني قلت لأحد؟؟
يلا قول الاسم والا ترى أترس البلوغات اشاعات عنك
:)
مشاري
شلون وقفت ضد الصقر بالله؟؟
يا رجل، اتق الله جزاك الله خير وأحسنت
:)
wonders
اتصدق اني ما حضرت؟ تعب مفاجئ، الظاهر الكبر شين
:)
لا قانون ولاهم يحزنون، أنا راح أسويله سحر أخليه يعترف بالي سواه والي ماسواه، اذا في شي ما سواه
:)
عندي حش لما ألاقيك على ام اس ان
:)
نشفوا الديرة
نهبوها
مسحوا الإقتصاد
دمروا البنية التحتية
ضيعوا المستناد و اطمسوا الحقائق
و الحسابات
خلطوا السياسة
عفسوا التركيبة السكانية
خالفوا الناس و العالم المجاور في خطط التنمية
دخلوا الدين بالسياسة
الديرة راحت بساعتين لمدة 7 اشهر من صدام و نظامه
تشرد الشعب و قتل من قتل و تضرر من تضرر
و رجعت الديرة و زاد الخراب اكثر من بعد وعود في مؤتمر جدة
بس طلع الحجي و الندوات و المواقف و الوعود
مجرد حجي ماميش..حجي بطالية..حجي شياب و عواهر !
علي بابا
untouchable
ظكووو عليهم و طلع صوتهم
صاروا بس يهوشووون اللهم يا كافي
حالهم ما يسر
كلهم ما عليهم قاصر
بني آدم طماع
ما يدري إن جك بوم
مو ماخذ منها شي
بس شنقول مالنا إلا الصبر
شبيدنا نسوي إذا كباريه البلد ساكته و مو قادرة عليهم
عتيج الصوف
أنا معاك ان الوضع مزري، بس حتى أكثر الأوضاع فساداً يمكن اصلاحها بالاصرار، وفي شواهد تاريخية على هذا، موافق؟
:)
اليوم المزاج أحسن ونسبة التفاؤل عندي ارتفعت شوي
ريما
أنا قلت نسويله عمل نربطه بيه، بس محد موافقني
:)
والله شي محزن، بس في أصوات عالية والرجل سمعته الوطنية والسياسية صارت بالحضيض، وهذه خطوة زينة
وانت كيف أحوالك؟؟
اول شى جزاج الله خير
لا تحاجينى جنى لحيتى لى سرتى ودشداشتى لى ركبى
:))
مع ان فيهم ناس وايد محترمين ويعتبرون قدوة
ولكن
محمد الصقر كان احد المطلبين للتعصب للدماء الزرقاء بشدة
وفجأة صار دمبكجى مال عام
باختصار كلام لمياء هو الزبدة
ونسيت اضيف مرى واقرى على بابا حرامى وتفهمين شقصد
وبعدين يا ستى من زمان ما شربنا فنجان رواء على الصوت الملائكى
شحن سياسي بغيض
:)
اذا كل من بيشكك بذمة أي واحد يفضح الحرامية عزة الله لا طبنا ولا غدا الشر
بدال لا نقول الصقر فيه ومافيه يفترض نقول الكلام اللي قاله صح والا غلط ؟ ياب شي من عنده ؟؟ تجنى على أحد؟؟ استفيدوا من اللي قاله أول بعدين حاسبوه وان قدرتوا على غيره بتقدرون عليه بس ما تكون عذر عشان انكمل مسلسل الصمت الرهيب
أحسنتى يا تويتى كلم جميل
WW, I'm as good as honey then ;)
Tweety, touché!
ماضاع حق وراه مطالب ..!!؟
ومال لبوق ما يرتفع فوق ..!!؟
لا تيئسين ولا تحبطين فالطريق طويل للوصول الى المطالب ..!!؟
كتبت شعر عن نفس الموضوع عند "ديلي" أقرئيه يريحك شوي .. ومشكوره على السؤال ...!!؟
شلون كانت لبنان؟
عسى راح الاحباط؟
مشاري
في أحد مو دمبكجي هالأيام؟؟
جهز القهوة وشغل فيروزأ أنا بالطريق
:)
تويتي
يسلم هالفم
هذا التغريد الجميل
بالفعل، تخطينا الي يقوله الصقر وصرنا نبحث عن نقط ضعفه هو
ولهذا السبب احنا في دوامة، نلف وندور على أنفسنا
سعود
اي والله، تغرد سياسياً هالتويتي
:)
شوشو
نعم، خصوصو لما تدلعيني بالكويتي القديم
:)
2 u all
الحين أمر على ديللي
تسلم قريحتك الشعرية
عالية
لبنان جميلة بس حزينة
وراح الاحباط وحل محله الخوف
الوضع كان فهلاً يخوف شوي
:)
بس أروح مرة ثانية لو يحصلي
احبها
:*
Post a Comment